Sus, Bergers, qu’on se resjouysse,
Et que chacun de nous jouysse
Des faveurs qu’Amour luy depart :
Ce bel âge nous y convie,
On ne peut trop tost ny trop tard
Gouster les plaisirs de la vie.

Suivons ce petit Roy des ames,
De qui les immortelles flames
Gardent Nature de perir :
Choisissons-le pour nostre maistre,
Et ne craignons point de mourir
Pour celuy qui nous a fait naistre.

Les oyseaux des bois et des plaines
Chantent leurs amoureuses peines,
Qui renaissent au renouveau,
Glorieux au mois où nous sommes,
De brusler du même flambeau
Qui brusle les Dieux et les hommes.

L’Astre doré, qui sort de l’onde,
Promet le plus beau jour au monde,
Que puissent choisir nos desirs :
Tout rit à sa clarté premiere,
Qui semble apporter les plaisirs
En nous apportant la lumiere.

(…)

Extrait de « Les Bergeries »