Alme sommeil, moictié de nostre vie,
Le seul repos de nos esprits lassez,
Qui entretiens par termes compassez
L’ame & le corps d’une esgalle harmonie,

Trop longuement ta douceur est bannie
De ces beaux yeux, de veiller offencez,
Et ton absence, assez & plus qu’assez
En son tourment le repos luy desnie.

Vien donc sommeil, medecin du soucy,
D’un doux fardeau luy charger le sourcy
Couvrant ses yeux de tes humides aisles,

Ainsi jamais ne te puisse-on nommer
Frere à la mort, ains pour Dieu reclamer,
Ayant sauvé la fleur des Damoiselles.

Extrait de « Œuvres, III » (1610)