Honneur, cruel tyran des belles passions,
Qui traverse l’espoir de nos affections ;
De combien de malheurs est la terre féconde,
Depuis que ton erreur empoisonne le monde ?
Ce Dieu, dont les amants reverent le pouvoir
Ne recognoissoit point l’Empire du devoir ;
Ce fust toy, qui premier fit glisser en nostre ame
Ces foles visions de la honte et du blasme :
Qui premier nous apprint à taire nos desirs,
Qui premier nous apprint à cacher nos plaisirs,
Et dont la tyrannie, aux amants trop cruelle,
S’opposa la premiere à la loy naturelle.
Petits oiseaux des bois, que vous estes heureux,
De plaindre librement vos tourments amoureux !
Les valons, les rochers, les forests et les plaines
Sçavent également vos plaisirs et vos peines,
Vostre innocente amour ne fuit point la clarté,
Tout le monde est pour vous un lieu de liberté.

(…)